ഡല്‍ഹി മെട്രോ സ്റ്റേഷനിലുണ്ടായ ദുരനുഭവം വെളിപ്പെടുത്തി യുവതി. ജോര്‍ ബാഗ് മെട്രോ സ്റ്റേഷനില്‍ നിരവധി ആളുകളുടെ നടുവിലാണ് താന്‍ ലൈംഗിക അതിക്രമത്തിന് ഇരയായതെന്നും സ്ഥലത്തുണ്ടായിരുന്ന സിഐഎസ്എഫ് ഉദ്യോഗസ്ഥര് യാതൊരു നടപടിയും സ്വീകരിച്ചില്ലെന്നും യുവതി ട്വിറ്ററില്‍ കുറിച്ചു.
ട്വീറ്റ് സമൂഹമാധ്യമങ്ങളില്‍ ചര്‍ച്ചയായതോടെ മെട്രോ പോലീസ് കേസ് റജിസ്റ്റര്‍ ചെയ്തു. വ്യാഴാഴ്ച ഉച്ചയ്ക്ക് 1.50നു 1.55നു ഇടയിലാണ് സംഭവമെന്ന് യുവതി പറഞ്ഞു.
യുവതിയുടെ വാക്കുകള്‍ ഇങ്ങനെ…ആ സമയത്ത് കുറച്ച് ആളുകള്‍ മാത്രമാണ് സ്റ്റേഷനിലുണ്ടായിരുന്നു. ഒരു വിലാസത്തെക്കുറിച്ച് സംശയവുമായി ഒരാള്‍ സമീപിക്കുകയായിരുന്നു.
അയാളെ ഞാന്‍ സഹായിച്ചു. ഇതിനുശേഷം കാബ് ബുക്ക് ചെയ്യാനായി പ്ലാറ്റ്‌ഫോമിലിരിക്കുമ്പോള്‍ വീണ്ടും അയാളെത്തി. സഹായത്തിനാണെന്ന് ഞാന്‍ വിചാരിച്ചു.
എന്നാല്‍ വിലാസം അടങ്ങിയ ഫയല്‍ കാണിക്കാന്‍ ശ്രമിക്കുന്നതിനിടെ പെട്ടെന്ന് അയാള്‍ തന്റെ ലൈംഗികാവയവം പ്രദര്‍ശിപ്പിച്ചു.
എങ്ങനെ പ്രതികരിക്കണമെന്ന് അറിയാത്ത വിധം ഭയങ്കരമായിരുന്നു അത്. ഞാന്‍ സ്തംഭിച്ചുപോയി. ഭയന്ന്, എത്രയും പെട്ടെന്ന് ഓടിപ്പോയി.
ഇത്തരമൊരു സംഭവം ഉണ്ടായാല്‍ എങ്ങനെ പ്രതികരിക്കണമെന്ന് നമുക്കറിയില്ല. കാരണം ഇങ്ങനെയൊന്നും നമ്മള്‍ പ്രതീക്ഷിക്കുന്നില്ല.
ചില ഉദ്യോഗസ്ഥര് അവിടെയുണ്ടായിരുന്നു. പക്ഷേ സിസിടിവി ദൃശ്യങ്ങള്‍ ഉണ്ടായിരുന്നിട്ടും അവര്‍ ഒന്നും ചെയ്തില്ല.
ഇതു കഴിവില്ലായ്മയാണ് അതല്ലെങ്കില്‍ ഈ സാഹചര്യത്തെ എങ്ങനെ കൈകാര്യം ചെയ്യണം എന്നതിനെക്കുറിച്ച് ഉദ്യോഗസ്ഥര്ക്ക് വേണ്ടത്ര പരിശീലനം ലഭിച്ചിട്ടില്ലായിരിക്കാം.
എത്ര തവണ സംഭവങ്ങള്‍ നടന്നാലും ഇതു സ്ഥിരമാണെന്നു ന്യായീകരിക്കാനാണ് അവരുടെ ശ്രമം.
ഞാന്‍ മെട്രോയില് യാത്ര ചെയ്യുന്നത് ഏറ്റവും സുരക്ഷിതമാണെന്നു കരുതിയാണ്. എന്നാല്‍ ഈ സംഭവം വളരെ വലിയ ആഘാതമാണ് ഉണ്ടാക്കിയത്.
സിസിടിവി ദൃശ്യങ്ങള്‍ പരസ്യമാക്കിയാല്‍ ഞാന്‍ പറയുന്നത് എത്രത്തോളം ശരിയാണെന്നു മനസ്സിലാകും.’ യുവതി വിവരിക്കുന്നു.
സംഭവം അതീവഗൗരവത്തോടെയാണ് കാണുന്നതെന്നും നടപടി സ്വീകരിക്കുമെന്നും ഡിഎംആര്‍സി പിആര്‍ഒ സുമന്‍ നല്‍വ അറിയിച്ചു.
സംഭവദിവസം സിഐഎസ്എഫ് കോണ്‍സ്റ്റബിള്‍ ഡ്യൂട്ടിക്ക് പുറത്തായിരുന്നു. അതിനാലാണ് പെണ്‍കുട്ടിയോട് സിഐഎസ്എഫ് കണ്ട്രോള് റൂമിനെ സമീപിക്കാന്‍ നിര്‍ദേശിച്ചത്.
പോലീസ് സിസിടിവി ദൃശ്യങ്ങള്‍ പരിശോധിച്ചപ്പോള്‍ പ്രതി മറ്റൊരു മെട്രോയില് യാത്ര ചെയ്യുന്നതായി കണ്ടെത്തിയെന്നും പിആര്‍ഒ അറിയിച്ചു.
